ENCONTRO CON ARANTZA PORTABALES

 

Ao carón de Arantza Portabales, existen moitas posibilidades de sorrir para o fotógrafo. 

Tamén son moitas as posibilidades de que o torrente verbal de Arantza ofreza unha sucesións de momentos cómicos que non eluden os motivos da conversa.

Asasinato no muíño do cura constitúe a segunda entrega dos Crímenes de Loeiro.  

A historia gravita sobre o involuntario proceso de recuperación da memoria dunha vítima que, ao esclarecer o seu pasado, atopa a súa verdadeira identidade.

Unha das virtudes deste relato que sucede en dous momentos históricos e en varios espazos, é presentar un caleidospio sobre a identidade: mulleres que ocultan un terrible segredo baixo o manto de beatería e homes que exhiben máis dunha cara coa que perpetrar o engano.

«Ti tes visto unha muller, eu vin unha pantasma», lemos case no arranque da trama desta novela de misterio na que o lector é interpelado, constantemente, sobre quen fixo tal e por que.

E, evidentemente, nunha novela titulada así, hai mortos.

Porque mesmo durante unha conversa con Arantza, calquera dos asistentes pode rematar morto.

Ficcionalmente... Non?

 

Francisco Rodríguez Coloma

&

MG, EC, EG 

 

 

 

 

TEMPO DE LECTURA

 

Marie Laurencin pintou este grupo de artistas. 

A figura que ocupa o espazo central ten nas mans un libriño no que, dificilmente, poidan caber o relato de Julián Ayesta ou os versos de Dores Tembrás.

Ou si?

TEMPO DE LECTURA

 

«El libro es un pájaro con más de cien alas para volar», dicía Ramón Gómez de la Serna.

Parece que os corvos que pintou Gisella Navarro teñén interese en ler as suxestións desta semana. 

 

ENCONTRO CON XABIER LÓPEZ

Contrabiografía é un artefacto literario culturalista e esixente. 

Xabier López emprega unha voz autorial que intermedia co lector, que presencia, ben advertido, un relato que se vai cocendo ante os ollos do lector. 

Para esta work in progress, que mellor estrutura que a da cebola, símbolo tamén dunha reminiscencia proustiana que leva ao lector ata obrador onde crepita o rustrido das empanadas.

Todos sabemos que o noso nacemento é un accidente. Procurar unha explicación a esa orixe esixe indagar sobre os nosos devanceiros, tarefa case sempre imposible para moitos de nós.

Ao longo desta novela, que reflexiona sobre en que consiste a construción dunha novela, sucédense diversas historias  intercaladas que tentan a paciencia do lector, que deberá proseguir a camiñata da man do autor, para chegar a comprender que esta Contrabiografía podería ter sido titulada Cartobiografía. 

Un dos méritos inequívocos de Xabier López é contar a historia da súa xénese familar á par que presentar unha xeografía física, literaria e sentimental sobre os camiñantes de todas as épocas que cruzaron e seguen a cruzar as pontes, todas as pontes.

E como a literatura sempre será unha ponte, agradecémoslle a Xabier López a profundidade das súas reflexións sobre a construción e as ruinas, o horror e a vinganza. 

Será un pracer volver a coincidir lonxe de barbarie, nun lugar que si exista, non en calquera Bali-Hai.

 

Francisco Rodríguez Coloma

&

MJPF e EC 

TEMPO DE LECTURA

Chegados a este momento do ano, pouco medo hai que terlle ao medo. 

Inspirados polo ilustrador David Vela, aceptamos o risco de ler historias de terror e relatos protagonizados por quen experimenta o sexto sentido.

ENCONTRO CON ARANTZA PORTABALES

ARANTZA PORTABALES, Asasinato no muíño do cura, Galaxia, Vigo, 2026, 388 páxinas.

 

O martes 3 de novembro, ás 19 horas, recibiremos a visita de Arantza Portabales, coa que poderemos falar sobre o Asasinato no muíño do cura.

No caso de que algunha persoa estea interesada en acodir a este encontro, pode comunicar ese desexo ao correo bibliofranciscoaguiar@gmail.com.

TEMPO DE LECTURA

 

Claro que o máis oportuno é levar na mochila o libro que esteamos a ler.

De telo esquecido na casa, podemos optar polos poemas de Ismael Ramos ou un fragmento narratimo de Aroa Moreno.