mércores, 24 de maio de 2023

ENCONTRO CON ARANTZA PORTABALES




 
 
 
    Comezamos a tarde falando de microrrelatos, porque aí é onde nace a traxectoria da actual “voz poderosa da novela negra” que é Arantza Portabales. A escritora estivo onte na libraría Biblos de Betanzos para presentar O home que matou a Antía Morgade, publicada na editorial Galaxia. 
   “A Arantza novelista ‒compartiu‒ débelle moito á Arantza microrrelatista, porque aprendeu que se pode contar a historia dunha vida en cen palabras”, para engadir que “o microrrelato cultivou a miña voz como narradora”. 
   Quen diso tamén sabe moito é o profesor Francisco Rodríguez Coloma, encargado de encamiñar a conversa coa escritora e partidario manifesto dos xéneros literarios en formas breves (coadministra a bitácora Documenta minima). 
   Ambos abordaron numerosos detalles de O home que matou a Antía Morgade, unha historia que prende, arredor do derrubamento dunhas vidas marcadas polo peso da culpa e o lastre do remordemento.
   Grazas a Arantza soubemos que “as novelas negras non se constrúen, destrúense”, que este xénero veu para quedarse na súa traxectoria como escritora e está a darlle moitas satisfaccións. 
 
Crónica e fotografías: Carmela González

Ningún comentario:

Publicar un comentario